Forcat ruse po krijojnë “lista të ukrainasve të identifikuar që do të vriten ose do të dërgohen në kampe” në rast të një pushtimi, sipas një letre të dërguar nga SHBA për shefen e OKB-së për të drejtat e njeriut, Michelle Bachelet, ka raportuar Washington Post.

Letra pa datë citon sjelljen e Rusisë në pjesë të Ukrainës që ajo tashmë i ka pushtuar dhe thotë se informacionet e fundit sugjerojnë se po planifikohen abuzime të mëtejshme, të cilat më parë kanë përfshirë “vrasje të synuara, rrëmbime/zhdukje me forcë, ndalime të padrejta dhe përdorim të torturës”.

Mesazhi, nga ambasadorja e SHBA-së në OKB, Sheba Crocker, paralajmëron se një pushtim rus i Ukrainës do të krijonte një “katastrofë të të drejtave të njeriut” me informacion të besueshëm se forcat ruse gjithashtu kishin të ngjarë të “përdornin masa vdekjeprurëse për të shpërndarë protestat paqësore ose për të kundërpërgjigjur ndryshe, ushtrimeve paqësore të rezistencës së perceptuar nga popullata civile”./arbresh.info/